中環出更：做老襯快添丁青聯喜事不絕
匯聚城中富二代嘅香港青年聯會（青聯），日前喺灣仔會展舉行新一屆就職典禮。初為人父又榮升主席嘅霍啟剛表現風騷，大方任影兼有問必答。佢話屋企多咗個新成員之後，更加體會到青年工作嘅重要性。卓妮問佢有冇幫手餵奶？佢就笑笑口話：「老婆餵人奶，我點幫手呀？」
啟剛話，做咗爸爸固然開心，但有好多細節同禁忌要學。佢媽媽朱玲玲好有心思，送咗部單鏡反光相機同大光圈鏡頭畀佢，等佢影囝囝影得靚啲。
當晚食物及衞生局局長高永文及副局長陳肇始都有出席，陳肇始入政府之前係護理學教授，啟剛講笑咁話，第日湊仔遇到問題，都搵會佢哋幫手喎，高永文就話歡迎之至。
鄭志剛已為人父兩年
除咗啟剛，同場唔少青年才俊都好事近，有人就快做老襯、有人就快添丁，仲有人靜靜地做咗爸爸添！全國青聯副主席鄭志剛（Adrian）同海味大王女兒余雅穎結婚三年多，一直保持低調，據聞早就做咗爸爸添！卓妮當面問Adrian做咗爸爸未？佢就答話：「做咗喇，做咗兩年喇！」但當追問佢究竟係生仔定女時，佢把口始終都密實。
今年初結婚嘅會董潘偉業，同太太鄺晶晶（Akiko）甜蜜現身，明顯肚凸凸嘅Akiko甜笑宣布，已懷有三個半月身孕，日前照咗超聲波，醫生話九成機會係女，老爺潘少忠好開心，應承會送間豪宅畀佢。喜事近嘅仲有前立法會議員楊孝華長子楊哲寧（Jonathan），將與拍拖四年、從事物流業嘅女友林佩嫺拉埋天窗，明年一月喺香港迪士尼舉行夢幻婚禮，擺六十圍大宴親朋。
卓妮