維修凹凸地磚 路署遲緩
太子界限街一段行人路旁種滿大樹，路人發現有大樹根部持續生長，令地磚「逼爆」，形成路面陷阱。馮先生每朝均行經上址前往晨運，坦言曾兩度被凸起地磚「戟親」，不滿路政署遲遲未有維修。「我哋呢啲老人家，跌一跌骨頭就碎，經過嗰度都會特別小心，但係有時手腳唔靈活，真係會中招！」
路政署發言人解釋，早前已發現上址路磚受路旁樹木根部影響而呈現不平，已進行局部維修，與康文署商討後，現正安排全面重鋪工程，同時擴大個別樹穴，並因應附近環境升高部分行人路面水平，以減低樹根生長對路磚的影響。
「留畀樹根生長嘅窿真係要大啲，如果唔係整得嚟棵樹又大咗，遲早都會再逼爆，咁就真係整嚟都嘥氣！」馮先生認為路政署在重鋪路面前應仔細研究，勿再出現「逼爆」地磚情況。