政情:公民講場:高永文有排執手尾

政府尋日宣布成立由食物及衞生局局長高永文領導嘅醫院管理局檢討督導委員會。高永文話,醫管局成立咗超過二十年,未來會面對人口增加、人口結構轉變同老齡化等挑戰,所以都係時候檢討,做個「全身檢查」。喺上屆政府掌管食物及衞生局嘅周一嶽在任期間,醫管局醫護人手缺乏之餘,市民輪候公營醫療服務又等到頸都長,不時又發生醫療事故,可謂留低一堆堆爛攤子。高永文話齋,醫管局嘅管理、聯網運作、資源分配、服務水平、人事任用等都要檢討,真係做十個大手術都未必搞得掂!