政情：張文光遊戈壁 見海市蜃樓
前教育界立法會議員張文光曬到一身健康膚色，原來佢同太太啱啱去完蒙古旅行。張文光話估唔到今次喺蒙古戈壁沙漠見到海市蜃樓。不過如果佢發現一直爭取嘅普選原來都只係海市蜃樓，相信佢就開心唔落喇。
滴水沖涼 唔慌乾淨
張文光今個月初同太太跟朋友一行十幾人去蒙古，喺沙漠足足逗留咗成個星期。張文光話，佢哋喺戈壁嗰幾日都係住蒙古包，最慘係沖涼時冇熱水之餘，仲要水力弱到幾乎逐滴滴出嚟咁。咁搞法真係沖咗都唔慌乾淨啦。
張文光又話佢同太太搭車時見到遠處一座白色廟前面有一群駱駝喺湖邊飲水，點知部車經過座廟時就只見駱駝唔見水。朋友就話佢哋見到嘅原來只係海市蜃樓。張文光話佢以前都聽過海市蜃樓，一直都想睇吓，所以今次都算圓咗個心願喇。