新任美國駐港總領事夏千福上任後動作多多，又去茶餐廳歎奶茶，又去二手書店睇書，大做親民騷。尋日美領事個facebook官方戶口又無啦啦提醒大家，記住要留意下周一網上首播嘅紀錄片《向華盛頓進軍》，仲話呢條片記錄咗美國人權史上最大型政治運動，黑人民權領袖馬丁路德金都係喺呢個運動發表「我有一個夢」演說。
就咁睇似乎冇乜嘢，但心水清嘅人會知道，佔領中環發起人戴耀廷經常用馬丁路德金發起嘅「向華盛頓進軍」做例子，話當年馬丁路德金召集三十萬人「進軍」華盛頓，事前無人睇好，但事後迫使美國政府推動民權法同投票法，令黑人白人平起平坐，而且幾十萬人聚集都無出現暴力事件，證明多人唔等於混亂。
正當佔中成為政界最熱話題時，美領事突然叫大家留意馬丁路德金嘅抗爭歷史，究竟係咪想曲線撐佔中，大家心中有數。有網民好醒，即時留言話美領事係別有用心喎。