正所謂「書中自有黃金屋」，追求崇高嘅學術資歷原來亦代價不菲。尋日有讀者向本報爆料，話灣仔區青年大使會創會主席周錦威，喺民政事務總署網頁嘅灣仔區青年活動委員名單上寫有博士銜頭，但報料人質疑佢冇喺本港大學讀過博士同交過論文，有欺騙市民之嫌，又指控佢用博士銜頭企圖呃錢呃勳銜。

周錦威就澄清，相信有人惡作劇，願以人格擔保從來冇呃人錢，至於被人話假冒博士，佢就理直氣壯咁解釋：「我曾經捐錢畀美國一間大學，大學就畀番一個榮譽博士學位我表示謝意。」佢仲話其實好多名人都會咁做，只係有啲人唔了解，所以係一場誤會喎。

周錦威透露，佢嘅榮譽博士學位係好多年前由美國皇家百聖大學（Queen's University of Brighton）頒授，以佢了解榮譽博士係唔需要寫論文，佢當年捐咗幾十萬元畀大學，於是獲得「表揚」。不過，我哋上網搜尋過呢間大學，發現學校嘅官方網站已經關閉，仲竟然以簡體字顯示要畀續約費先可重開網站。