政情：殺入大窩口 麥美娟想「燒鴿」？
葵青區下大窩口選區一向係白鴿黨嘅地頭，建制派屢攻不下，鎩羽而回。工聯會（工記）立法會議員麥美娟（Alice）就挑戰難度，最近殺入該區開設議員辦事處，尋日搞咗個盛大嘅開幕禮，仲邀請民望唔錯嘅食物及衞生局局長高永文主禮，莫非佢有意「燒鴿」，為兩年後嘅區議會選舉鋪路？不過，Alice就話只係想擴展服務，所以下站會去到青衣同屯門開辦事處喎。
高永文撐場 互笠高帽
講番尋日嘅辦事處開幕，高永文致辭時就同Alice互戴高帽，狂讚對方喺醫療政策問題上跟得幾足，做咗幾多工夫。而Alice又唔放過呢個機會同高永文爭取長者牙科免費服務同興建食環署街市，認真蠱惑。開幕禮開始前，高永文聽到有表演者唱起「明天會更好」一曲，竟顯得非常陶醉，仲拍晒手和奏，莫非佢覺得依家政府個「熱廚房」好難捱，所以對呢首歌好有共鳴？
高永文就話，佢每逢聽起勵志歌就有啲忘形。對於依家社會嘅爭拗，佢話如果呢啲不同意見都係為香港好嘅話，都會係好聲音喎。不過，何為好意見，相信大家一樣會拗餐飽囉。