香港青年時事評論員協會（青評會）早前搞論壇邀請各路英雄商討普選，點知應邀出席嘅愛港力陳淨心突然企上枱揮國旗，成個場即時被愛港力班人反轉，搞到好多枱櫈全部報銷，最終青評會不得不腰斬論壇。估唔到呢單嘢仲有手尾跟，借出場地嘅「Good Lab」最近寄咗張單畀青評會要佢找數，盛惠八千大元。
青評會主席周浩鼎（Holden）話，會同一班兄弟啃咗佢，都唔叫愛港力找數，費事同佢哋再有來往喎。當日論壇雖然火花四濺，但本來只限口角，但去到尾聲陳淨心突然不能自控，跳上枱猛揮國旗，之後幾幫人同時大混戰，結果整爛咗十張櫈、兩張枱。「Good Lab」寄來帳單，青評會須賠八千幾蚊。
點解整爛幾張櫈就八千蚊？話說當日大戰前夕，唔少電視台攝影師為咗收音好啲，都將咪貼喺天花板喇叭，而咪線就用牛皮膠紙黐實牆身，點知一搣走膠紙，牆身油漆即刻花晒，呢筆數又要入埋周浩鼎數。