「佔領中環」成日聲稱佢哋嘅行動係和平非暴力，但人多聚集嘅地方，為保證可以保持和平，佔中發起人戴耀廷（Benny）話已經搵心理學家寫緊關於情緒管理嘅教材，預計一至兩個月就完成。
Benny尋日出席電台節目時話，為咗佔中行動可以和平非暴力進行，佢哋已經籌備緊訓練課程，搵心理學家寫教材，教佔中參加者喺面對暴力挑釁同衝擊時點樣管理情緒。不過人多起哄嘅地方，要管理情緒無咁易喎，好似上星期旺角街頭發生衝突咁，情況好混亂，搵心理學家教人管理情緒，簡直就係紙上談兵。
「幫港出聲」召集人周融都喺度，佢話，佢哋依家喺網上嘅支持者有四千五百人，已經叫咗大家唔好隨便撳「like」，要真係支持先好做，點知都有咁多人，作為建制派網頁嚟講都算係一個奇迹。
Benny就話，佢哋冇主動叫人簽意向書，但依家都有一千人簽咗，當中有一半人表示會公民抗命，唔同得喺網上畀個「like」咁易。