畀人鬧係「大罪人」亂使錢嘅財政司司長曾俊華，其實都識幫政府慳荷包，話說政府六月份組團同一班廠商飛往緬甸考察取經，其中一站要由仰光轉去緬甸首都奈比多。
成個團三十幾人，得財爺同隨行人員搭內陸機，但其他廠商就要逼巴士逼足七個鐘。最後有隱形富豪廠商頂唔順政府咁慳家，回程寧願叫自己架私人飛機接走一班廠商。
今次呢個團由政府包底使費，由仰光去首都內比都，曾俊華由於希望當晚會見一眾緬甸政府官員，所以同班隨行人員搭咗內陸機，一個鐘搞掂。
而政府為咗慳錢，其他唔使見官嘅廠商就要逼足七個鐘巴士，由於緬甸山路崎嶇，眾人震到屁股痛至去到內比都。
既然去程七個鐘，回程當然都係七個鐘，有位廠商突然話頂唔順，唔想屁股繼續受罪，即時急召自己架私人飛機去內比都，接載部分廠商返仰光，其他廠商當時至知原來團中有位低調富豪，仲講笑話估唔到商界出手闊綽過政府咁多，都唔知係政府協助商界，定係商界幫助政府。