監警會秘書長朱敏健早前接受電台訪問時，直指上周日喺旺角行人專區舉行嘅撐警方集會係「政治活動」，休班或退休前休假警員出席集會有可能違反《警察通例》。有撐警人士質疑朱敏健「未審先判」，對被投訴警員唔公平。有人更發起「燒豬（朱）行動」集體向監警會投訴朱敏健，要求佢公開道歉。監警會主席翟紹唐尋日接受電視台訪問時就為下屬講好說話，強調撐警集會係咪政治活動，並非監警會處理相關投訴嘅主要考慮，有關批評對朱敏健並唔公道。
