政情：前審計署長鄧國斌「投保」
好多保險公司都鍾意搵啲會計師或核數師擔任獨立非執行董事，幫公司目及實盤數。政府尋日透過首長級公務員離職後從事外間工作嘅登記冊公布，喺舊年七月退休嘅前審計署署長鄧國斌，今個月起擔任美國信安保險有限公司嘅獨立董事。雖然鄧國斌係做AO（政務主任）出身，本身無會計師資格，但係佢喺任內踢爆咗無數政府部門同高官嘅浪費公帑行為，包括「貪曾」前特首曾蔭權爵士嘅瘋狂外訪醜聞，有佢幫手目及住公司盤數，自然令人放心。
任內踢爆貪曾瘋狂外訪
翻查紀錄，鄧國斌喺出任審計署署長之前，曾經喺○○至○三年出任保險業監理專員，不過呢啲已經係足足十年前嘅事，相信唔會被指有角色衝突或延後利益問題。公務員事務局亦好小心咁，規定仲喺「冷河期」內嘅鄧國斌，唔可以喺受僱期間使用或披露任職政府時所取得嘅任何機密或敏感資料，以免畀人質疑。
鄧國斌去年退休後冇耐，就獲政府委任為十‧一南丫島海難嘅調查委員會委員，委員會四月底先至完成工作提交調查報告，佢抖咗三個零月就再有新工作，明顯係退而不休。相信以佢嘅能力同背景，嚟緊仲會有其他私人工作或公職都未定。