公務員事務局會定期印製同發出電子版嘅《公務員通訊》，藉此與全港十多萬公務員溝通同傳達政府資訊，間唔中更會專訪某啲高官，披露佢哋鮮為人知嘅一面。原來擁有唔少員工嘅民政事務總署，早前亦推出咗一份名為《民采》嘅員工通訊，模式同內容幾乎抄足《公務員通訊》，其中今年二月面世嘅創刊號，就專訪咗該署署長陳甘美華希望打響頭炮，第二期亦啱啱喺上個月推出。但據聞唔少民政署職員都好似唔知道呢份刊物嘅存在，傳媒亦無報道過，認真嘥氣！
講番份刊物本身，陳甘美華喺《民采》創刊號中，自爆自小就對「書中有畫，畫中有書」嘅傳統中國書畫藝術十分着迷，早年正式搵書法老師習字後，對水墨世界嘅博大精深更為認識。談及工作與生活平衡，陳甘美華自言從「量」嚟講，佢畀家人及自己時間絕對及不上辦公時間，不過一切最重要係「質」喎。難道佢係話緊自己喺政府返工服務市民時，係重量不重質？