政情：鄉紳蝕本想換波
新界東北鄉紳近日出盡牙力支持新界東北發展計劃，其中上水鄉事委員會主席侯志強仲因為發表「廢人論」為捲入利益衝突疑雲嘅發展局局長陳茂波護航，畀反對發展計劃嘅人士圍攻，質疑佢哋力撐新界東北同瞓身「護波」，係為咗賺取可觀嘅收地賠償。不過有鄉紳就同我哋呻，其實佢哋都為新界東北發展犧牲咗好多，未賺先蝕，陳茂波事件更加谷到佢哋一肚氣，如果換局長可以幫到計劃推進，佢哋一定舉腳支持。
打從陳茂波剛上任，首次落區主持首場新界東北諮詢會，侯志強等鄉紳已瞓晒身力撐政府，主動組織村民撐場與反對人士抗衡，又多次冧友到立法會「護波」，但政府後來竟然臨時縮沙，將坪輋剔出首階段發展範圍，令該區村民見財化水。有鄉紳就指出，反對人士唔會因為縮窄發展範圍而變為支持計劃，但原先支持計劃嘅坪輋居民，就會因為喪失發展機會而轉為反對，政府咁做簡直係自製敵人，蠢到冇朋友。
氹環團 犧牲村民
鄉紳又話，至今只有少數環保團體以保育理由反對新界東北發展，底因係政府一早已將大量具保育價值嘅農地同海岸，納入成為法定嘅郊野公園同海岸公園，「冧掂」咗唔少環保人士。不過擁有有關土地嘅村民就多得政府唔少，搞到喪失畀政府或私人發展商收地發展嘅機會，就算有關地主或農戶疊埋心水繼續務農，將來想砍棵樹、挖吓地、或者拆咗間爛屋仔起過，都要問准相關政府部門同郊野公園委員會，乜自由都冇晒。
至於有人質疑班鄉紳對收地賠償金額愈叫愈高，例如要求同菜園村看齊每戶賠六十萬元，有人更加碼要求一百萬甚至二百萬元，獅子開大口。有鄉紳話其實佢哋都知道唔係所有菜園村村民都獲賠六十萬，要符合好多條件先至攞到，但好多村民都對六十萬呢個數字入晒腦，認為如果代表佢哋嘅鄉紳爭取唔到呢條數，就係對唔住村中父老，佢哋先至要硬着頭皮代為反映。
賠償額提高無望
至於陳茂波事件，班鄉紳私底下鬧得比泛民更兇，其一係鄉事派對發展局早前嚴打村屋僭建仍然耿耿於懷，其二係將來政府想回應村民訴求提高賠償金額時，實會因今次事件而被指明益局長外家，令所有村民受害。所以佢哋心底裏都期望陳茂波自己識做盡快辭職，讓新界東北計劃重新上路，唔好阻住大家發達。