中環出更：仁愛堂野外行學子「非」凡體驗
仁愛堂上月中率領一班學生前往東非肯尼亞考察十多日，日前已順利返港。團長兼副主席陳婉珊（Clara）話，此行受到幸運之神眷顧，見到獅子、長頸鹿、大象、羚羊、河馬等大量野生動物，又睇到動物大遷徙、紅鶴湖、死火山等奇觀，更遇上難得一見嘅野狗，Clara話，有隨行專家考察肯尼亞十幾年，都係第一次見野狗。
此程一行人探訪當地原住民部落，與游牧維生嘅馬賽族交流。學生們見到赤裸裸嘅族人，用牛糞搭建嘅房屋，甚感好奇。族人即場示範鑽木取火、講解捕獵嘅過程，更以動物角部造成嘅樂器吹奏音樂，大跳民族舞。團員們就送出原子筆畀當地學生，事關當地買原子筆相當昂貴。
鴕鳥圖探頭入車
隨行仲有主席陳鄭玉而丈夫陳鑑光（Charles），佢話途中發生唔少趣事。話說佢哋有日近距離遇到隻巨型坦桑尼亞鴕鳥，見到人類非常好奇，主動走近觀光車並試圖將頭伸入車內，令學生們既驚又喜。佢哋又見到斑馬瞓喺地上碌地沙，原來係想「搽太陽油」，皆因泥濘有防曬作用。
Clara直言，旅程有開心亦有苦處，冇諗過非洲日夜溫差咁大，夜晚凍到要用暖水袋。Charles就話，野外塵土飛揚，每次出訪之後，頭髮都好似落咗髮泥咁，條褲洗四次都唔乾淨。雖然係咁，學生此行獲益良多，學懂珍惜所有，但就嫌旅途太短唔夠喉，希望有機會再來訪。Clara就認為，旅程提升咗學生對大自然嘅興趣，以及對雀鳥嘅認識。
卓妮