二人投契 會煲電話粥
李偲嫣記得認識梁美芬係○七年冬天，當時佢有位朋友係梁美芬嘅法律系學生，但兩人真正熟落，可以坐低傾偈就係○八年春天。佢話一同梁美芬傾偈，就發覺大家非常投契，總會有傾唔完嘅話題，有時面對面傾偈都仲未夠，仲要煲電話粥個幾兩個鐘至夠喉。嘩，真係情如姊妹花喎！
後來梁美芬當選立法會議員後，就邀請李偲嫣以兼職身份擔任「項目主任」，專責教育議題。李偲嫣話當時仲要照顧幼兒，咁啱呢份工唔困身，自己又喜歡教育，所以就一口應承。咁啱梁美芬尋日亦喺網上力撐李偲嫣，話就算李偲嫣破過產，公眾都唔應該歧視佢，而佢聘請李偲嫣更加係公開資料，好榮幸大家可以合作咁多年喎。