政情：評爆粗事件黑英講歷史
小學女教師以英式粗口鬧警察兩句，驚動正反陣營各自動員，最終引發近三千人佔領旺角西洋菜南街行人專用區對峙。天文台前台長林超英（黑英）都有留意呢單新聞，但係佢選擇唔正面評論林老師爆粗事件，改為同大家講歷史。
籲大家勿做道德判官
黑英話，其實件事緣於對「正義」定義嘅分歧，可惜呢個世代嘅香港愈來愈二分化、凡事非黑即白，忘記咗好多嘢都可以「多維」（multi-dimensional）分析。佢仲預言如果香港再係咁落去，就淪落到好似歐洲中世紀獵殺女巫，同法國大革命時期利用斷頭台將「反革命分子」斬首咁殺害異己，到時就會萬劫不復喇。
咁依家林老師豈不是被人當「女巫」「獵殺」？黑英似乎有口難言，淨係話依家最關注保育同教育「兩育」，總之呼籲大家唔好當正自己係道德判官，要從多角度睇「正義」呢回事，做到理直氣「和」咁就最好喇。黑英搬出歷史說教，咁就全身而退喇！