政情：今日你上鏡：立會雙「雄」 應邀踢波唔認真
立法會開始放暑假，留港抖暑嘅梁國雄（長毛）、張超雄、郭偉強同單仲偕（騸雞），尋日應邀出席港隊無家者世界盃出征波蘭嘅授旗儀式，兼落場踢邀請賽。
張超雄着皮鞋 長毛揸流攤
踢開波嘅長毛同郭偉強明顯有備而戰，長毛更帶齊護膝同頭箍，就連騸雞都假假哋笠件波衫上身，反觀兼任大學講師嘅張超雄就以一身Ｔ恤西褲襯皮鞋嘅造型出場，着對釘鞋當道具都懶。開波之後，賽前被睇高一線嘅長毛自日前絕食暴跌十幾磅後，狀態明顯下滑，經常「揸流攤」任由對手放甩。至於騸雞同張超雄，開波冇幾耐連影都唔見喇！