政情：訪問澳外長 陳啟宗記者上身
恒隆地產主席陳啟宗（Ronnie）最近炮轟財政司司長曾俊華（鬍鬚曾）未能做到應使則使，歷史會證明佢係「大罪人」，激發鬍鬚曾先後幾次反擊，除咗笑笑口話感到「心情沉重」外，前日再透過網誌反駁「守財奴」指控，尋日又再反駁多次，睇嚟鬍鬚曾相當有火，唔知Ronnie點睇鬍鬚曾嘅反擊呢？
靜靜雞走秘道避傳媒？
咁啱身兼亞洲協會香港分會主席嘅Ronnie尋日以主人家身份，舉行午餐會招呼訪港幾日嘅澳洲外交部長卡爾（Bob Carr），但佢午餐會結束後隨即靜靜雞從秘道離開，亦冇通知傳媒，大家想追問佢點睇鬍鬚曾反擊都冇機會喇，莫非佢忽然覺得相嗌唔好口，唔想再隔空罵戰？
講番個午餐會，Ronnie同卡爾喺台上有講有笑，期間仲記者上身，問卡爾點樣看待中日就釣魚島嘅爭議。卡爾作為資深外交官，被Ronnie逼埋牆角亦無奈接招，指好多重大衝突都係由細小爭議引發，但澳洲喺事件嘅立場就係「冇立場」，搞到Ronnie有啲冇癮。不過，卡爾就話對香港最終實行普選感到樂觀，算係冇令大家失望喇。