政情：蔡堅跌斷腳 聲言向領匯索償

要坐輪椅巡病房

以為平日咁忙嘅蔡醫生可以藉此機會抖番吓，點知佢話有兩個病人入咗醫院，佢仲要去巡房，行唔到就坐輪椅去巡病房喎。病人見到佢坐喺輪椅都去診症，真係好感動。

蔡醫生話，左腳小腿骨斷咗，腳踭有啲細骨又裂埋，搵咗食物及衞生局局長高永文個老友謝潤鈿醫生同佢做手術，鑲咗十幾粒螺絲喺隻腳度，而物理治療師教緊佢行路，明日就可以出院。不過，佢出院後都冇得休息，出院嗰日又要開會，仲狂數嚟緊有乜嘢會議要開，只係門診睇少啲。

提起領匯，蔡醫生都無名火起，事關今次佢喺領匯旗下黃大仙中心跌傷，條氣好唔順，大鬧領匯只係識加租，又唔注重清潔，搞到佢跣親喎，真係要諗吓點向領匯追筆醫藥費喎。