政情:半粒鐘散水 行會避風「波」?

今屆行政會議例會每逢周二舉行,每次都起碼開足三個鐘。不過,尋日嘅行會竟然開咗約半個鐘就結束,咁啱日前爆出發展局局長陳茂波喺新界東北發展計劃中涉嫌利益衝突,究竟兩者有冇關連呢?

下月放兩周暑假

話說兩個月前爆出前行會成員張震遠嘅商品交易所涉財困後,咁啱嗰個星期舉行嘅行會就暫停會議。當日有聲音批評行會係因為商交所事件而暫停會議,雖然事後行會已解釋因為冇議程而暫停會議,但啲人依然繼續鬧。所以尋日行會只係開咗半個鐘就散會,有人就陰謀論話係咪行會又冇議程,但又驚唔開會惹來外界猜測同陳茂波事件有關,先至扮開會半個鐘避免批評呢?

尋日朝早所見,雖然行會開咗約半個鐘就散會,但仍發現有幾位行會成員喺散會半小時後才離開,所以究竟會議時間有幾長,都冇一個肯定嘅答案,亦未必因為冇乜議程而縮短會議。

暑假已展開,據聞行會下月會休會兩星期,即休會兩次,放暑假時間已較上屆政府大大縮短。

第一手消息請下載on.cc東方互動iPhone/iPad/Android/Windows Phone Apps