政情：靚聲楊敏德 姚珏封為偶像
國際小提琴家姚珏一向予人女強人嘅形象，原來佢嘅偶像亦係一位女強人，就係有「紡織女王」之稱嘅理工大學校董會主席楊敏德（Marjorie）。近期姚珏創立一個專業弦樂團，仲邀請Marjorie愛女潘楚穎（Dee）贊助樂團兼擔任形象指導。姚珏透露，佢同Marjorie相識多年，去年曾於理大周年活動同台演出，佢好欣賞對方嘅能力同才華，直言封咗對方做偶像喎。
楊女助音樂家「裝身」
姚珏話，去年理大演出中，Marjorie高歌一曲，佢就以小提琴伴奏，大讚對方歌聲美妙。佢透露，現正申請樂團成為慈善機構，初步免費培訓二十位年輕音樂家，提供平台畀佢哋同國際音樂家聯手演出，另外亦會走入各大學及社區作路演，更計劃到港鐵站內表演。
身為時裝品牌掌舵人嘅Dee就話，好希望能夠幫助年輕人達成夢想。問佢會點樣為呢批年輕音樂家包裝？佢話會同時設計隆重及輕便嘅服裝，方便出席唔同場合。講到音樂家嘅體形問題，Dee話毋須擔心，事關佢嘅品牌有三百幾個尺碼以供選擇，保證人人啱着喎。