政情:郭炳江撐「大罪人」與陳啟宗唱反調

被指為「守財奴」嘅財政司司長曾俊華,早前被恒隆集團主席陳啟宗(Ronnie)鬧爆,話佢冇奉行應使則使嘅原則,係香港大罪人。新鴻基地產主席兼董事總經理郭炳江尋日出席一個活動時,就與Ronnie大唱反調,話鬍鬚曾一直審慎處理財政,佢認識嘅商界朋友都認為財爺做得幾穩健。鬍鬚曾年年估錯數兼求其交行貨,都獲得大孖沙力撐,難怪佢話愈做愈興奮喇!

郭炳江尋日出席活動時,兩度接受傳媒訪問,期間仲主動提及鬍鬚曾被Ronnie批評一事,情況罕見。郭炳江唔止明撐鬍鬚曾,對於政府提出嘅新界東北及西部嘅發展計劃,亦讚不絕口。佢話睇過規劃藍圖,覺得洪水橋及古洞北選址好好,發展概念亦唔錯,除咗有充足嘅房屋供應,落成後將令房屋供應穩定之外,洪水橋嘅新市鎮規劃中,仲有辦公大樓及商業設施等。佢話,新界需要一個商業中心。

咁新地喺當地有咩發展大計?郭炳江就話:「言之尚早!」強調依家仍然研究緊。會否倣效恒基地產主席李兆基捐出農地呢?佢話,如果大家搵出一條可行嘅方式,集團都會考慮。咁佢又點睇發展局局長陳茂波家族喺古洞囤地逾萬呎事件?郭炳江就話唔清楚發生咩事喎!

出席活動 爆童年秘辛

講番尋日嘅活動,新地旗下挪亞方舟推出暑期多元智能啟迪課程,郭炳江喺啟動儀式上大爆童年秘辛,話自細父親郭得勝對佢嘅學業好着緊,媽媽全程陪佢讀書,即使佢考得唔好亦唔會打罵,所以佢做爸爸之後,亦沿用父母嘅教育方式,所以奉勸城中父母勿太緊張。

第一手消息請下載on.cc東方互動iPhone/iPad/Android/Windows Phone Apps