政情：民記想割自己人票倉
之前熱論過一輪嘅立法會地方選區劃界問題最近忽然間靜晒，據聞係同考慮中嘅方案影響到建制派最大政黨民建聯（民記）嘅利益有關。最近民記有人諗縮數提出一個新方案，一方面可以解決新界西人口過多嘅問題，另一方面又唔會令民記現有議席減少，就係將現時屬於新西嘅葵青區撥歸九龍西。不過呢個方案會將民記現任新西議員陳恒鑌（阿Ben）嘅票倉一分為二，令人質疑民記內部有人想逼走阿Ben。
麥美娟田北辰等受累
新西人口預計到二○一六年將突破二百零八萬人，按人口比例計應該有十名立法會議員，因此有人就建議增設新界北選區，從新西同新東疏散咁啲人口，又或者將現時屬於新西嘅整個離島區、或當中人口較多嘅東涌劃歸港島，同時解決新西人口過多同港島人口減少嘅問題。
不過，據聞該兩個方案都遭到民記強烈反對，因為該黨去年喺泛民配票失利、自己分票又極為順利下，先至好彩喺新西連取三席，即譚耀宗、梁志祥同阿Ben，但當中吸票能力最高嘅黨主席譚Sir，預計會喺下屆退休，如果再劃走部分離島或北面選區，該黨好難保住現有三席。
最近民記有人提議將葵青撥歸九西，令新西議席減至七席，民記應可取得兩席，至於人口本已持續增加嘅九西，加埋葵青之後可能會增至八席，民記「元秋」蔣麗芸名單只要攞到約七萬票，就已經夠贏兩席，合計幫民記保住新西加九西現有嘅四席，點計都唔會蝕章。有區內人士分析，葵青撥九西方案的確對民記最有利，但係就威脅到同屬建制派嘅工聯會麥美娟、新民黨田北辰同西九新動力梁美芬。
陳恒鑌「兩面不是人」
阿Ben喺上次選舉主要靠荃灣同葵青區食胡，該方案變相將佢嘅票倉割開，令佢留守新西就未必夠票贏，轉戰九西又要同該區嘅第二梯隊爭，兩面不是人。我哋就該方案問過阿Ben，佢回應強調荃灣葵青本屬同一區，在多方面都關係密切，分開納入兩個立法會選區，可能影響到對居民嘅服務，明顯有好大保留囉。