中環出更:戲迷黃進達 忙裏偷「行」影音店

唔少人都鍾意睇電影,認為睇戲可以減壓兼解悶,不過唔係個個都有時間入戲院睇戲。好似康泰旅行社總經理黃進達(Jason)咁,經常飛到世界各地實地考察,開發新嘅旅遊路線,佢又將於九月同女友拉埋天窗,最近積極籌備婚禮,更加忙到冇時停。日前一個黃昏晚飯時間,卓妮喺金鐘見到Jason一支公現身,佢好匆忙咁走入一間影音店兜咗個圈,想搵齣好戲睇,不過最終都係冇收穫。

當日晚上約七點十五分,西裝骨骨嘅Jason行經金鐘太古廣場,卓妮見佢步伐好急促,似乎有緊要事做。當佢路過影音店時,忽然放慢腳步,原來佢畀店內嘅影碟吸引,忍唔住走進店內來個極速搜尋。

唔啱心水 乜都冇買

佢行勻整間影音店,最後目光停留於最新發行嘅外語片貨架上,不過佢睇極都唔啱心水,最後冇買嘢就離開。

卓妮上前同Jason打招呼,佢話約咗人傾公事,見有少少時間,所以趁機逛吓街。佢話自己一向鍾意睇電影,可惜工作太忙,好多時想睇嘅電影已經落咗畫,惟有買碟返屋企睇補數。佢話自己咩電影都睇,不過最主要都係睇西片,至於影片質素就唔係太講究,有得睇已經好開心喎。

卓妮仲發現Jason手執一本《廣東省交通地圖集》,問佢係咪要返內地公幹,怕唔識路所以做定功課?佢笑言,只係參考吓啫!講到婚禮,佢話場地布置交晒畀女友話事,自己就積極修身,已經略有成果。

卓妮

第一手消息請下載on.cc東方互動iPhone/iPad/Android/Windows Phone Apps