中環出更:莊主難當 黃家和大「法」雷霆

法國嘅紅酒、美食及名牌令人着迷,早前法國駐港澳總領事館舉行國慶酒會,城中政商界名人齊去捧場,期間仲發生咗件趣事。啱啱收購咗法國酒莊嘅香港餐飲聯業協會會長黃家和(Simon)都有到場,卓妮以為佢躋身法國酒莊莊主,實好威風啦,點知佢一臉愁容,猛話喺法國做生意難,仲當面向法國駐港澳總領事栢雅諾(Arnaud Barthelemy)投訴添!

Simon話,早前法國商務部部長來港推廣投資環境,廣邀港商去當地投資,點知原來去當地開公司都唔容易。

向法駐港澳總領事投訴

佢先用咗五個月時間先至完成公司登記,然後開銀行戶口又用咗三個幾月,至今仍未搞掂。點解?皆因當地銀行好似驚佢洗黑錢,要求攞良民證等證明,做嘢又慢吞吞,好唔積極。佢話,相比喺香港開間公司唔使廿四小時就搞掂,經此一役,佢忍唔住嘆一句:「始終都係香港好」。

當日Simon難得見到栢雅諾,梗係要趁機投訴幾句啦,話要等佢哋祖國再做得好啲喎!栢雅諾聽完好重視,仲約Simon搵日再詳細傾談。酒會同場仲有菱電集團主席胡曉明夫婦、香港鐘表業總會前主席陳正欣及朱繼陶、港協暨奧委會會長霍震霆(Tim霍)等人。

Tim霍嘅長子、香港青年聯會主席霍啟剛即將為霍家增添新成員,卓妮問Tim霍送乜嘢禮物畀孫仔?霍老爺笑而不語,諗咗幾秒後,賣口乖話:「要孫仔孝順爺爺就真!」咦?呢位霍家第四代傳人,真係男孫嚟喎!

卓妮

第一手消息請下載on.cc東方互動iPhone/iPad/Android/Windows Phone Apps