政情：袁彌明當選人力主席 冀增年輕及女性選民
人民力量（人力）主席劉嘉鴻（劉嗡），早前辭去人力主席一職，事隔多時終於有新主席橫空面世，呢個就係前港姐袁彌明（Erica），任期直至二○一五年四月。Erica話當選主席希望加強凝聚力，為人力帶來更多年輕選民及女性選民。
最快下周參與絕食運動
出身演藝界嘅Erica出名靚女，有人預言靚女掌舵人力，人力男性支持者數目有望激增，亦有人擔心Erica形象與人力格格不入。Erica自言有人話佢溫柔，亦有人話佢激進，總之群眾運動不應區分呢啲嘢，最快下周就會動身參與絕食五十小時運動喎。
至於未來兩場選舉，Erica話人力喺下屆區議會選舉唔會參與泛民主派協調，除非大家有共同政綱，又會堅持二○一六年立法會全面直選，二○一七年特首普選無篩選，而且不接受任何密室談判。至於佔領中環行動，佢話只要方案符合人力嘅基本立場，佢哋就會支持喎。
話時話，今次Erica做咗人力主席，睇得幾個政黨政團都由女性當道，相信呢股女性聲音真係不容忽視。另外人力副主席有三人，分別係陳志全、甄燊港及嚴達明。