政情：鄧家彪搞錯觀鯨季節 報團後始知要等冬天
立法會放暑假，唔少議員都會趁機同家人去旅行。勞工界議員鄧家彪（Bill）都唔例外，佢今個月底將會同太太帶埋四歲囡囡去斯里蘭卡玩十日。不過，阿Bill原本諗住帶囡囡出海觀賞鯨魚，但佢喺旅行社報咗團之後先知道觀鯨要喺冬天，依家惟有帶囡囡去嗰邊睇海龜補番數喎。
月尾突要開會勢缺席
阿Bill話，佢去報團時個職員同佢講斯里蘭卡有鯨魚睇，佢見囡囡都想睇鯨魚，於是就揀咗去斯里蘭卡，仲一口氣支付共三萬九千元團費。不過，意外就喺呢個時候發生，職員話佢知觀鯨係要喺冬天嘅，但都可以去當地睇下海龜咁話。就係咁，阿Bill帶囡囡睇鯨魚嘅大計就話咁快幻滅咗。
原來呢次旅行令阿Bill超出預算，理想幻滅嘅唔止係觀鯨大計，仲有「扮勤力」嘅計劃。話說佢一心諗住早啲去旅行，早啲返香港，跟住就可以全力工作，等人以為佢成個暑假冇去過旅行，好勤力。不過，佢千算萬算都估唔到人力事務委員會會喺本月三十一日開會，最後都係要同「缺席」扯上關係。