中環出更:榮升院長 梁卓偉呻苦差

食物及衞生局前任副局長梁卓偉(Gabriel)去年到香港大學執教鞭後,早前仲揮低三名對手,接替李心平出任港大醫學院院長,將於下月一日上任,成為該校近百年來最年輕嘅醫學院院長。卓妮日前喺一個音樂活動上見到Gabriel,於是上前恭喜佢「升呢」啦,點知佢笑笑口話:「有咩咁值得恭喜吖,苦差嚟o架!」

精通樂理嘅Gabriel一出現,在場嘅一班靚女都爭住同佢影相,真係魅力逼人。唔少人輪住向佢講恭喜,有啲嘉賓仲問佢攞新卡片,但佢似乎未習慣「院長」嘅稱呼,攤大手板話:「我都未上任,邊度有卡片啫?」其實Gabriel做官時都幫上司孭過唔少鑊,一樣游刃有餘,做院長又點會難倒佢吖!

同場仲見到香港島婦女聯合會主席張雅麗(Carol),見佢神采飛揚,佢話自己剛去咗印尼峇里島舉行婚禮,一班親友同行,喺沙灘見證浪漫一刻。嚟緊暑假,佢打算同囝囝晉熙去新加坡參觀Legoland。

張雅麗囝囝志願做醫生

講到愛兒,Carol甜笑話,囝囝好乖,仲識得自己睇書,話志願係要做醫生喎。

卓妮

第一手消息請下載on.cc東方互動iPhone/iPad/Android/Windows Phone Apps