政情：鍾國斌做「粉紅救兵」
有「新立會方中信」之稱嘅立法會議員鍾國斌（Felix），身材高瘦唔在講，加上來自紡織及製衣界，揀衫着衫自然有一手。早前佢就建議立會同事葛珮帆（EQ）買過批衫改形象，嚟緊仲會親自帶埋EQ及同屬立會新丁嘅何俊賢（高佬賢）同陳恒鑌（阿Ben）一齊去揀衫，變身立會「粉紅救兵」，認真唔話得。
叫EQ着多啲鮮色衫
Felix透露，早排同EQ傾開偈時，話覺得街板上嘅EQ較為古板嚴肅，同佢喺立法會見到嘅活潑EQ有好大出入，於是就提議EQ着多啲可以令佢望落較後生嘅鮮色衫，又建議高佬賢同阿Ben買多幾套時款西裝，等佢哋去到立法會開會嗰陣，唔使來來去去都係着嗰幾套咁悶咁老土。
Felix成日叫同事買衫換形象，但唔係個個議員好似佢咁富貴喎！Felix強調，其實只要識得窿路，唔使好多錢都可以買到名牌靚衫，例如海怡半島附近有棟專賣傢俬嘅工廈，入面其實雲集唔少知名國際品牌嘅特賣場，但由於唔係好多人知道，所以啲衫比其他特賣場更平更抵，有時低至兩折就執到心水名牌貨，稍後啱時間仲會帶埋EQ等三人上去掃貨。