扶貧小組委員會主席馮檢基話，呢次台灣、日本團已有九人報名，團費只比北歐團平一千蚊咁多。點解北歐同日台兩個地方差咁遠，都係平得個一千蚊？阿基就話因為去北歐得七天，但去台、日就去足九天，而且北歐七天團有兩日時間用嚟搭飛機，反而台日團飛幾粒鐘就搞掂，兩者相比當然去台、日抵得多。
北歐制度難倣效
其實阿基話錢銀事小，最緊要係有無考察價值，轉去亞洲國家嘅最大原因，係因為北歐屬於高稅制、高福利主義國家，同香港制度南轅北轍，如果貿貿然將北歐嗰套放喺香港，唔一定有用，所以先轉揀亞洲國家，起碼生活情況少少相同，其中日本嘅長者退休制度非常出名，而台灣就叻在解決在職貧窮問題，希望考察完呢兩個地方有少少得着喎。