要聞港聞
中環出更:「廠」入馬場 黃靜文做義工
施榮懷(中)喺本月新舊行政總裁交接期間,有黃靜文(左)同梁世華(右)兩個得力助手搞會務。(葉華英攝)
俗語話「一山不能藏二虎」,但凡事都有例外嘅。尋日中華廠商聯合會(廠商會)喺沙田馬場舉行紀念盃賽,雖然懸掛三號風球兼落雨,仍無阻會長施榮懷(Irons)同一班會董拉大隊入場湊熱鬧。今年廠商會盃賽最特別嘅,就係有兩個行政總裁同場出現,包括新上任嘅黃靜文(Adeline)同本月底卸任嘅梁世華(Paul)。
昨未履新 滿場飛打交道
由於尋日係七一公眾假期,所以Adeline應該今日先至履新,難得佢唔介意做義工,滿場飛同會董及賓客打交道,認真抵得諗。佢坦言,可以借呢個機會對商會加深認識,事關會長同副會長就見得多,但會董就有成一百個,要記晒每一個名字都唔容易,但佢就話會加倍努力去記o架喇。
廠商會青委陳家偉話家中一對龍鳳胎七個月大,已非常百厭。
廠商會青委周紹榮(左)與上屆工展小姐冠軍蘇慧恩(右)新婚三個月,今次孖住出席盃賽。(溫國佳攝)
梁世華喺新卡片上自稱長者或退休人士,認真幽默。
曾任民政事務總署副署長嘅Adeline話,以前專責慈善團體有關事務,今次再見番啲老友感覺好親切,往後亦會加強廠商會同善團嘅聯繫。卓妮見佢苗條咗,佢話以前做官坐得多冇運動,卸任後多走動反而瘦咗。阿Paul就大讚Adeline好幫得手,可以安心交棒。佢仲派咗張新卡片畀卓妮,上面自稱「長者/退休人士」,認真幽默。
廠商會明年成立八十周年,Irons預告重頭戲,將撥捐八位數字予本地一間大學,但捐畀邊間仍未有定案。卓妮見佢曬黑咗又Fit咗,原來佢一向有坐骨神經痛,最近聽醫生話勤游水紓緩痛症,結果減磅之餘,連帶血脂、膽固醇水平都靚晒,做起事都特別起勁喎。
卓妮
第一手消息請下載on.cc東方互動iPhone/iPad/Android/Windows Phone Apps