政情：廢腑之言：鄭耀棠古舊打風稱黑球
熱帶風暴溫比亞正逐步逼近廣東，呢幾日天氣將會轉差兼有狂風驟雨，若果真係打到嚟，影響就大咯，尤其建制派會今日喺各區舉行大批活動，而重頭戲就係喺添馬公園舉行嘅大型嘉年華會，呢個被視為同民陣發起七一遊行打對台嘅活動。
民陣方面一早就已經講明，若果溫比亞打到嚟，七一遊行會取消，會延後到七月七日遊行，咁建制派嘅嘉年華會又點呢？
嘉年華會嘅搞手、工聯會名譽會長鄭耀棠尋日出席一個活動時，畀記者多番追問後，就話：「若果聽日（七月一日）黑球嘅話，活動就會取消，詳情會透過傳媒公布。」棠哥所講嘅內容，大部分都理解到，但年輕一輩可能就畀佢嗰句「黑球」，搞到一頭霧水，究竟「黑球」係乜嘢嚟呢？嘉年華會同黑球有乜關係？
其實黑球係好耐之前嘅用語，即係打大風，天文台掛八號風球囉！依家當然包埋黑色暴雨警告喇！棠哥到依家仲噏住「黑球」，唔多唔少反映咗佢係乜嘢年代嘅人囉。