政情:肥佬黎搞事指揮部搬竇

臨近七一,壹傳媒「肥佬黎」黎智英、漢奸李柱銘、民主阿婆陳方安生等搞事嘅人早前已經畀我哋踢爆連日開會密斟。我哋早前影到肥佬黎喺加多利山嘅屋企變成指揮總部,同搞事分子密密開會,另一次又影到幾個民主黨前主席,除咗李漢奸例必出席外,李永達同何俊仁都到齊。今日就係七一,搞事分子尋日又開會,不過指揮部改咗喺中環嘅陸羽茶室。而民主阿婆又繼續發表意見,講到敵我分明,總之要講到七一為止。

公眾地方傾密計?

肥佬黎尋日比平日遲咗兩個鐘出門,可能因為係星期日嘅關係啦,佢如常出發飲早茶,但原來「肥佬有約」。佢九點鐘去到陸羽,原來係密會好朋友,「搞事指揮部」原來移師咗嚟呢度,何俊仁同李永達已經坐定定等肥佬黎埋位,位置就係喺肥佬黎最鍾意坐嘅卡位度。三人坐咗埋角落密密斟足一個鐘鬆啲,期間我哋想話了解吓佢哋咁好傾,傾緊啲乜嘢內容,點知肥佬黎即時發老脾怒吼:「喂唔好咁樣!」佢哋喺公眾地方飲茶,但竟然又有啲密計唔想畀人聽到,唔想人聽好心就返屋企講啦。

肥佬黎飲完茶後,對於自己旗下報紙被火燒,竟然話:「好事!惹多啲人上街!」咁怪!被人燒仲要話係好事?鐵頭仁就死撐大家只係「聚一聚,乜都講吓」,一味顧左右而言他。不過,你哋呢個組合有咩好傾?唔通真係飲啖茶,食個包咁純情咩?況且上次見面到尋日都只係十日八日時間,有冇咁癡纏呀?肥佬黎飲完茶返屋企後就冇再出門,可能繼續籌劃今日嘅遊行大計。

民主阿婆敵我分明?

除咗肥佬黎,「搞事四人幫」另一中堅民主阿婆就自動分工,趁七一前盡最後努力「拉客」,佢接受海外傳媒訪問時形容新政府搞「敵我分明」導致社會分化,但對「佔中」就完全未選定「行車線」,只係一味叫政府諗吓點解行動得到市民支持。不過「敵我分明」又有乜奇怪唧?佢夠係敵我分明啦,佢同肥佬黎行得咁密,又唔見佢同其他傳媒咁好關係!

第一手消息請下載on.cc東方互動iPhone/iPad/Android/Windows Phone Apps