政情:收料站︰張建東入院惹血癌復發驚魂

機場管理局主席張建東(Marvin)六年前突然驗出罹患急性血癌,當時出任行政會議成員嘅Marvin諗都唔諗就選擇休假,花費幾百萬元留喺美國醫病,好彩最後都平安返港復職。最近機管局爆出醜聞,有心水清嘅人就發現點解未見過Marvin出來回應,有傳聞話佢近期再度入院,佢身邊嘅朋友都非常震驚,擔心佢血癌復發,但好彩只係虛驚一場。

實為置換髖關節

牛高馬大嘅Marvin回港後平日睇落精神爽利,仍出任多個公職,好似科技大學校董會主席,同母校聖保羅男女中學校董會成員兼名譽司庫等。正當以為Marvin身體上返軌道,就突然傳來入院消息,據悉Marvin今次入院唔關血癌事,只係同髖關節有關。有傳因為佢早期打高爾夫球引致髖關節出問題,需要入院進行置換手術。隨着Marvin出院,親友個心先定啲。

其實Marvin經過血癌一役已看透世事,不但對錢銀賦予重新定義,唔收人工出任機管局主席之餘,對身邊一切處之泰然,一有時間就四圍打高爾夫球,享受人生,相信呢一役對Marvin嚟講都只係小兒科,相信大家好快就會見到佢。

第一手消息請下載on.cc東方互動iPhone/iPad/Android/Windows Phone Apps