發展局局長陳茂波上任以來是非纏身，尋日又鬧出笑話，佢出席立法會會議接受議員質詢時，唔知係咪緊張得滯，竟然三度將市區重建局嘅簡稱「市建局」講成已經被殺咗十幾年嘅「市政局」，但仲懵然不知，之後兩度提及市建局時都話：「市政……建局」，結果有議員發言時都忍唔住寸佢。面對議員嘅嘲笑，搞到啱啱上任嘅市建局主席蘇慶和好尷尬，其實陳茂波都上咗任成年啦，呢啲咁基本嘅名稱都可以講錯，可能係因為佢經常匿埋打網誌少見人累事。
