政情:議員帶血道具立會示威 象哥斥有礙觀瞻

立法會經過咁多年歷史,議員嘅示威手法都「進步」唔少,有人會放黑氣球以示不滿,亦有人暗藏示威聲帶嘅錄音機在身,總之抗議手法永遠日新月異,唔再係十幾年前咁悶。不過,進出口界議員黃定光(象哥)就唔睇好呢種趨勢,仲話有啲議員帶啲血淋淋道具,有礙立法會觀瞻喎。

帶中出會員遊立會

話說象哥尋日充當導遊,帶領中華出入口商會(中出)一班會員遊覽立法會大樓,由議事規則到議員座位安排都一一解釋。但班中出兄弟姊妹最有興趣都係啲花邊新聞,例如想知道當日有議員放氣球後,最後點收科?

象哥就話有關議員最終要畀幾千元行政費先收番個波,講到呢度即時挑起象哥條筋,佢話眼見近年議員示威手法好唔同,經常搬大型道具出出入入,有啲仲裝飾到血淋淋咁,對立法會形象都唔係好事。不過,老實講,議員為爭取選民支持,做啲嘢吸引眼球都係正常,如果好似象哥咁做功能界別議員,就唔使搞咁多花臣啦。

第一手消息請下載on.cc東方互動iPhone/iPad/Android/Windows Phone Apps