政情：梁高美懿唔認「梁太」？
前恒生銀行女大班梁高美懿（Margaret）退休前後都出任唔少公職，尋日佢就拍住特首夫人梁唐青儀出席一個慈善機構嘅頒獎禮。特首夫人向來不擅面對記者，所以依舊來也匆匆、去也匆匆，相反行走「商場」多年嘅Margaret就表現得好輕鬆，話說佢離開時為咗幫特首夫人擋駕，冒住畀老公詐型嘅風險，唔認自己係「梁太」。
成功轉移記者視線
對於三個寶貝仔女會否趁暑假返港，特首夫人聞言笑而不答，仲順勢拉埋Margaret離開。呢個時候，靠近記者嘅Margaret突然衝口而出：「我唔係梁太呀！」吓？究竟Margaret唔再係梁太，抑或想澄清自己唔係特首夫人呢？
無論如何，Margaret呢招已經成功轉移記者視線，二人亦成功走甩，認真高招。