政情：跟足盃賽衣着主題「粉紅男」閃爆沙田
着粉紅色衫唔係女人專利，尋日沙田馬場就出現咗好多粉紅色嘅男人，皆因太子珠寶鐘錶舉行年度盃賽，要求出席者衣着以粉紅色為主題。一眾女士化身Pink Lady當然易過借火，估唔到男士們都乖乖遵守遊戲規則。集團主席鄧鉅明（Jimmy）打粉紅色呔上陣，姐夫朱繼陶直頭成身粉紅色。嘉賓之一嘅前教育局局長孫明揚（孫公）同東華三院歷屆主席會主席孫秉樞都唔執輸，以粉紅色恤衫打底，成個青春晒。
孫公着紀念品恤衫
孫公話，件粉紅色恤衫係紀念品，以前經常出席活動，好多時都有恤衫送，佢見質地幾好，着得唔好嘥喎。Jimmy話，自己剛同太太宣宏雁（Emily）到美國出席二仔嘅大學畢業典禮，囝囝八月就會返香港幫佢打理生意。佢好期待囝囝回巢繼承父業，等自己可以快啲退休歎世界。
除咗粉紅色外，活動仲以牡丹花為主題。原來呢個係Emily主意，本身鍾意牡丹花嘅佢話，去年開始為公司旗下店舖裝上清新嘅牡丹花香薰，讓顧客增添嗅覺享受，大受好評。牡丹花乃富貴象徵，唔知佢哋會否因此賺多啲呢？