政情:劉嘉鴻辭人力主席

人民力量近期可謂多事之秋,先有黃毓民單方面宣布退出,矛頭更加直指早前喺報章撰文,支持真普選聯盟(真普聯)有關提名委員會方案嘅主席劉嘉鴻(劉嗡)。飽受黃毓民批評嘅劉嗡尋日喺人民力量執委會上宣布辭去主席一職,代主席為甄燊港,七一之後會選出新主席。

陳偉業嘆可惜

劉嗡撰文認同真普聯方案,促使毓民喺網上電台公開批評劉嗡行為完全背棄人力政綱,更加話同佢「道不同不相為謀」,要求佢引咎下台辭去主席一職。毓民一星期後宣布退出人力立法會黨團、人力執行委員會及民主倒梁力量,雖然人力執委發表公開信挽留毓民,但佢仍然不為所動,仲話彼此已經係陌路人,邊個接受挽留嘅就唔係人喎。

為咗令事件告一段落,劉嗡尋日喺人力執委上宣布辭去主席職務,理由係希望執委公平考慮毓民要求佢落台係咪合理。陳偉業就對劉嗡辭職感到可惜,但就話呢幾年都發生咗好多好可惜嘅事,又話人力可以發展至今都算係一個奇迹。毓民就話,自己已經退出人力,唔會評論劉嗡辭職一事,至於會唔會重新加入人力,佢就用「絕無可能」一句嚟回應。

第一手消息請下載on.cc東方互動iPhone/iPad/Android/Windows Phone Apps