中環出更：返美母校 陳智思遇卅年前同房
行政會議未放暑假，行會成員陳智思（Bernard）就已經回到校園時，早前佢返咗美國賓夕凡尼亞州母校Hill School出席校友聚會。難得返到母校，當然要影番幾張相啦，Bernard尋日就將此行照片放上社交網站。佢母校校園有齊湖光山色，不但環境優美令人心曠神怡，令人讀書都醒神啲，仲夠晒空間畀學生嘅體育細胞盡情發揮添。
讀書時代已熱衷運動
好多人都知道Bernard注重健康，熱愛運動，仲會晨早健身，原來佢嘅運動細胞早喺讀書年代已爆發。Bernard當年就先後玩過田徑同足球，仲先後喺校隊核心成員中做埋Team manager，佢今次重回母校仲搵到一九八二年足球校隊嘅陳年舊照片，可惜相中嘅Bernard比豆豉仲要細，睇唔到佢當年嘅雄姿。
Bernard搵到當年嘅舊相當然開心啦，但點都唔及見到真人咁興奮。話說佢此行仲重遇當年同房，三十年後校園再遇，二人再搭住肩膊影番張新相，從Bernard臉上笑容，大概都估到佢今次重遊母校滿載而歸喇。