中環出更：鄭海泉陪妻問板腦用法
前滙豐大班、中文大學校董會主席鄭海泉，經常要用電子產品處理日常事務，應該好熟悉其運作，但佢嘅另一半就未必喇。卓妮日前見到佢同太太曹志安孖住現身中環ifc，佢哋走入一間電子產品旗艦店後，鄭太隨即喺手袋攞咗部小型平板電腦出來，向店員請教近一小時。企喺身邊嘅鄭海泉等等吓，就攞部私伙平板電腦出嚟消磨時間，仲玩到連身旁支拐杖都跌咗落地。
當日下午近三點，鄭海泉夫婦雙雙現身ifc，鄭太一手挽住個手袋，一手小鳥依人咁翹實老公，二人有講有笑。佢哋走入該電子用品店，即時受到店員熱情招呼，鄭太急不及待由手袋取出一部小型平板電腦，向店員查詢用法。
鄭拐杖跌地 驚動全場
男店員好有耐性咁向鄭太細心解釋，鄭海泉聽佢哋傾咗一陣，自己就攞咗部平板電腦出嚟，好專注咁起勢篤。究竟佢都想學埋一份吖，抑或係等得唔耐煩呢？
正當鄭海泉對住部平板電腦，進入忘我嘅境界之際，擺喺身旁嘅拐杖忽然應聲倒地，發出響亮嘅「啪」一聲，驚動咗在場所有人，就連鄭海泉自己都成個醒晒，連忙彎腰執番支拐杖。男店員見狀，索性請佢哋坐喺店內嘅梳化，坐低陪佢哋繼續解釋，最後兩夫婦逗留咗一小時先至離開。
卓妮上前同鄭海泉夫婦打招呼，佢哋笑稱：「唔識用（平板電腦），要過嚟問嘢！」然後往寫字樓方向離去。
卓妮