肥佬黎寸爆回應:你當我神探?

【本報訊】寓所大閘被撞五小時後,「肥佬黎」黎智英始現身,他離家由司機駕車載往中環飲早茶,但對大批記者連番追問知否兇徒動機等問題則略顯忟憎,只以「唔知,點知啫!」等回應,又「寸嘴」向記者稱:「你估我係神探嚟啊?」

昨晨六時三十五分,身穿藍白色格仔恤衫、深色長褲的黎智英步出寓所,由司機駕車接載離開,在場守候的記者即趨前問他:「黎生,想問吓今次知唔知乜事?」,黎一邊上車一邊稱:「唔知,唔知,點知咩事呀大佬!」記者續追問他:「會唔會擔心啦?」黎便答:「唔擔心。」,記者再問:「估計同乜嘢有關?」,黎開始感嫌煩稱:「唔知,梗係唔知啦。」語畢即「嘭!」一聲關上車門離去。

遭記者追問 忟憎快閃

約二十五分鐘後,黎所乘房車抵達中環士丹利街陸羽茶室,他入內逗留約半小時後,手持一疊報紙離開。在場守候記者見狀,再上前追問他:「遇到咁嘅事驚唔驚呀?」,黎似笑非笑稱:「有乜好驚呀,大佬,呢啲咁嘅嘢」,有記者又追問:「估計係咩人做呀?」黎反問記者:「你估我係神探嚟呀?」,之後匆匆關門上車離去。

至早上約八時,黎乘房車返抵寓所外,再度被記者包圍追訪,有記者趨前問:「黎生,覺得今次同業務,以及七一有冇咩關係?」黎一邊落車一邊稱:「點知呀!點知啫!唉……你當我神探啊?」有記者再問他:「黎生點反應呀?」黎則語帶忟憎稱:「點反應呀,平常心,無咩反應,真嘅。」語畢便頭也不回,急步返回住所內。

第一手消息請下載on.cc東方互動iPhone/iPad/Android/Windows Phone Apps