中環出更:葉振南歎「庖丁解魚」度佳節

汕頭商會常務副會長葉振南(Stephen)上周六晚過咗個好溫馨嘅父親節,當晚佢同太太、兒子Albert及孻女Cecilia,喺尖沙咀一間酒店嘅日本餐廳撐枱腳,仲有幸一睹資深日籍師傅即場巧手表演「庖丁解魚」,令佢哋嘆為觀止,繼而品嘗鮮甜無比嘅吞拿魚刺身。不過刺身再甜,都唔及子女孝順咁心甜喇。

Stephen話,佢之後至知道,原來該酒店每年都會舉行「庖丁解魚」活動,「主角」係從日本空運到港、價值六位數字嘅原條吞拿魚,今次呢條屬於小型,重近六十公斤。當晚佢哋一家柯打咗魚腩部位嘅刺身,油脂豐腴,入口甘香,回味無窮。美食當前,怕肥嘅Stephen一於照食,寧願食完之後勤加跑步消耗卡路里。

孻女儲零用錢做東

原來呢餐飯係由讀緊書嘅Cecilia安排,佢專登儲起一筆零用錢做東,Albert就揀咗條靚呔送畀爸爸。而佢身在英國留學嘅二女Peggy,雖然未能趕及回港同佢慶祝,但已經速遞禮物到香港送畀佢。子女咁有心思,Stephen當然冧爆喇。

第一手消息請下載on.cc東方互動iPhone/iPad/Android/Windows Phone Apps