打工仔每年最期待嘅除咗有升職加人工，假期都好緊要。政府日前刊憲公布下年度勞工假期，旅遊界立法會議員姚思榮尋日就喺社交網站向打工仔傳授放假攻略，教打工仔搭日子放假之餘，仲附送埋旅行錦囊，教人邊段時期去邊度旅行係最划算。
根據姚思榮嘅旅行錦囊，打工仔只要配合勞工假請十七日大假，即可變出五十一日假，足足去到三次長途同埋六次短途旅行。姚思榮話，由於下年農曆新年本身連放四日，已經足夠打工仔去番轉東南亞，不過如果大家唔想留喺亞洲，姚思榮就建議大家向公司攞多四日假變成十日假，咁就可以飛去歐美等地叉足電先至返香港。
至於夏天去邊度避暑好，姚思榮話由於端午節係星期一，連六、日即一共三日假，可以去同香港有一小時時差嘅泰國度假。下年聖誕節連放四日，姚思榮就教人只要請多四日假，就可以提早收爐放足十一日。
佢又話香港年尾凍冰冰，忙足成年嘅打工仔最適合去澳紐一帶享受陽光與海灘，過一個熱辣辣嘅聖誕節。咁有心思，打工仔仲唔參考吓？