政情：高永文坪洲街市執到寶
身兼新界社團聯會會長嘅立法會議員梁志祥尋日殺入離島坪洲開設首個離島辦事處，聽聞遲啲仲會去梅窩開多一個添。尋日佢除咗邀請議員同鄉紳到場外，仲請咗食物及衞生局局長高永文同政制及內地事務局副局長劉江華做主禮嘉賓。話說典禮結束之後，梁志祥就捉咗高永文去巡區，除咗要求當局批准區議會喺坪洲診所旁興建升降機外，仲帶挈高永文買到心頭好。
劉江華冇跟去走寶
話說佢哋巡完診所一帶後，又去到當區嘅街市，高醫生見到啲鰵魚春就好似流晒口水咁，佢用咗近四百元分別買一條鹹魚同一抽鰵魚春。不過，魚春唔係好高膽固醇咩？佢話，煎香啲魚春好好味o架，唔係成日食都冇問題嘅。至於無跟去巡區嘅劉江華就走寶喇。
當初有分析話劉江華去年參選立法會超級議席落敗，係因為新界西黨友無落力幫忙，但如分析屬實，點解佢尋日仲去撐梁志祥呢？劉江華就話，佢都冇評論過啲票數，但選舉都過咗咁耐，唔再講喎。其實選舉未過一年，都唔算好耐啫，莫非真係政府呢個廚房真係太熱，佢感覺度日如年？梁志祥就話，該黨新界西三個候選人加埋嘅得票都唔夠劉江華多，所以點會無盡力幫佢呢？