政情：鄧家彪 郭偉強直選路氹氹轉
距離下屆立法會選舉仲有三年，據聞工聯會（工記）已開始部署多個參選陣式，但選用邊個陣式，就好視乎工聯會兩位長老陳婉嫻（嫻姐）同王國興（阿王）嘅參選去向。如果兩老要冧莊做多一屆，意味轉戰直選嘅勞工界功能界別議員鄧家彪（Bill）同郭偉強就要焗住轉到其他地區出選，可惜兩老遲遲未有決定，搞到鄧、郭兩個要到唔同地區插旗做定幾手準備，某程度被兩老玩殘。
焗跨幾區插旗勁頻撲
工記有個不成文規定，就係任何勞工界功能界別議員只可以做一屆，想連任就要轉戰地區直選，又或者唔選。所以仲年輕嘅阿Bill同郭偉強如果要連任，就要搵區出選，不過落邊區就真係仲未知道。我哋觀察所得，身兼離島區議員嘅阿Bill，除咗出現喺新界西同九龍西之外，原來北區仲有佢嘅蹤影。至於身兼東區區議員嘅郭偉強便頻頻就香港島及新界東嘅議題發言，即係佢哋每人最少兼顧兩至三區，相當頻撲。
有熟悉工記嘅人士話，原來工記布陣除咗要睇政府點劃界外，仲要睇吓嫻姐同阿王嘅意思。如果兩老繼續參選嘅話，阿Bill同郭偉強兩位年輕後輩就要讓路，分別跨區到九龍西及新界東，而另一後輩麥美娟（Alice）就繼續留守新界西參選。不過，有傳工會內有聲音認為現時立法會不時「拉布」，少啲體力都頂唔住，所以兩老唔選都係好事，而班後輩喺揀區參選上亦毋須太多顧慮。
麥美娟勢選超級議席
如果兩老放棄競逐連任，而政府維持現有五大區嘅話，阿Bill及郭偉強都可分別留喺原區新界西及香港島，分別接替Alice同阿王嘅議席。至於Alice一直都被工會入面嘅前輩睇好，所以出選超級議席亦係不二之選。不過，如果政府一旦劃出六大區嘅話，阿Bill仲可以開拓新界北添。雖然工記嘅領導層對選舉部署安排諗得咁周到，但就難為後輩落多區插旗分散投資，少啲精力都唔掂。