「貪曾」前特首曾蔭權爵士及「貪湯」前廉政專員湯顯明任內嘅貪婪醜行引起全城怒吼，有咁活生生嘅反面教材，官場中人依家收禮都醒定好多。身兼馬會大董嘅行政會議成員周松崗最近就主動向行會申報利益，佢上月廿六日賽馬日喺馬場宴客時，獲贈一支一九九○年Chateau Palmer Margaux Medoc法國紅酒，市價約二千多元。
按行會規定，價值超過二千元嘅禮物需要申報，周松崗一刻也唔敢怠慢，急急喺收禮後嘅第二日（廿七日）星期一，嗱嗱聲填表申報，並表明將支靚紅酒送畀馬會員工舉辦活動之用。
如果畀着第二個人遇到咁嘅情況可能唔使咁緊張，但係周松崗就一定要時刻保持頭腦清晰、身家清白至得，事關佢係特首梁振英喺貪湯事件揭發後，宣布成立檢討廉署酬酢、餽贈和外訪規管制度嘅獨立檢討委員會主席，而且同時係港交所主席及香港總商會主席，咁多重量級嘅公職掛喺佢身上，認真唔講得笑，否則就一失足成千古恨。