匯聚港區全國政協、人大代表及中華海外聯誼會理事等城中名人嘅香港友好協進會，早前舉行新一屆董事會就職禮，全國政協常委兼四洲集團主席戴德豐（Stephen）接任會長，政商界名流齊捧場，包括新世界發展主席鄭家純、恒基地產副主席李家傑及全國政協常委林樹哲等。

現場仲有一位稀客，佢就係旺旺集團老闆蔡衍明。蔡老闆話，佢同Stephen係相識近三十年嘅生意夥伴，所以幾忙都專程由上海趕來支持。

協進會副主席兼「玩具大王」蔡志明神情輕鬆到場，卓妮第一時間同佢講聲恭喜，事關早前佢中籤做馬主，年底又飲新抱茶，喜事連連。蔡志明笑稱，中籤養馬容乜易，囝囝蔡加讚結婚就真係好開心。佢仲爆料話，加讚與未來新抱汪圓圓正喺歐洲影婚紗相添！

霍英東集團行政總裁霍震寰及孻仔霍啟文亦齊現身，霍家長孫霍啟剛太太郭晶晶被傳有喜，卓妮問即將升呢做叔公嘅霍震寰，打算送咩禮物畀BB，佢笑笑口話唔識答喎。不過，佢好開心話，呢位全城關注嘅BB係霍家第四代首位嫡孫。霍家開枝散葉，後繼有人，難怪佢全程笑瞇瞇。

同場仲有好多青年才俊，包括百仁基金主席李文俊（Raymond）、觀瀾湖集團主席朱鼎健及中華總商會青委副主席黃楚恒等人。Raymond話，嚟緊將推出一系列活動，包括協助未能升讀大學嘅青少年搵工，亦打算組團去台灣訪問，未來半年有排忙喎！

卓妮