中環出更：廖偉芬租阿媽舖 絕無「母女價」
廖創興家族後人廖偉芬（Jennifer）進軍飲食王國，版圖愈來愈大，近日磨拳擦掌開設第二間精品咖啡店，佢首次向「舖后」媽媽廖湯慧靄租二千呎地舖，但廖媽媽揸正嚟做，租金跟足市價，阿囡都無情講喎。
憑雙手打造多間餐廳嘅Jennifer，向來唔想靠屋企，明知阿媽喺全港擁有多個靚舖，仍拒絕伸手「求舖」，近日佢得知媽咪有意放租灣仔一個地舖物業，於是同阿媽傾租約，結果一拍即合，新舖七月開張大吉。
開咖啡店 自家製麵包
人生首次同媽咪租舖，Jennifer笑言心情複雜。雖然廖媽媽企硬，租金無「母女價」，仲規定囡囡畀足訂金，一毫子都唔准少，但裝修設計就給予好大寬容度，任由囡囡點「舞」間舖都得。咁好嘅業主，Jennifer一於扑錘簽下六年租約，貪佢地段好喎。
新店將有新綽頭，Jennifer將推出自家製麵包，早前佢專程跑去法國拜師學藝，傳承製法國麵包秘技。今次開新店，廚藝將大派用場嘞。